Kenenisa Bekele will be competing with Kenyan runners Eliud Kipchoge and Wilson Kipsang-Berlin

0
425

አትሌት ቀነኒሳ በቀለ በበርሊን ቢ.ኤም.ደብሊው ማራቶን ላይ እንደሚወዳደር የውድድሩ አዘጋጆች አስታወቀ።

ቀነኒሳ በቀለ መስከረም 14 ቀን 2010 ዓ.ም የሚካሄደው የበርሊን ማራቶን ላይም ከኬንያውያኑ ኤሉድ ኪፕቾጌ እና ዊልሰን ኪፕሳንግ ጋር የሚወዳደር መሆኑም ተነግሯል።

በማራቶን ሩጫ የዓለማችን ሁለተኛው ፈጣኑ ሰው የሆነው ቀነኒሳ በቀለ በበርሊን ማራቶን ላይ መካፈሉም ለውድድሩ ድምቀት እንደሚሰጠው ተነግሯል።

በመስከረም ወር ላይ የሚካሄደው የበርሊን ማራቶን በርቀቱ የዓለማችን ፈጣን ሰዎች ከተባሉት አምስት ወንዶች ሶስቱ እንደሚሳተፉበት ታውቋል።

የ35 ዓመቱ ቀነኒሳ በቀለ በረጅም ርቀት የሩጫ ውድድር በርካታ ድሎችን ያስመዘገበ አትሌት ነው።

ቀነኒሳ በ10 ሺህ እና በ5 ሺህ ሜትር የሩጫ ውድድሮች የሶስት ጊዜ የኦሎምፒክ ሻምፒየን እና የአምስት ጊዜ የዓለም አትሌቲክስ ሻምፒየን መሆን ችሏል።

እንዲሁም በረጅም እና በአጭር ርቀቶች 11 የዓለም የሀገር አቋራጭ ውድድሮች ያሸነፈ ሲሆን፥ የወንዶች የ5 ሺህ እና 10 ሺህ ሜትር ርቀት የዓለም ክብረ ወሰኖችም በቀነኒሳ እጅ ይገኛሉ።

ቀነኒሳ በቀለ ፊቱን ወደ ማራቶን ያዞረው እንደ አውሮፓውያኑ አቆጣጣር በ2014 ሲሆን፥ በወቅቱም በፓሪስ ማራቶን ላይ በመካፈል 2 ሰዓት ከ05 ደቂቃ ከ04 ሴኮንድ በመግባት ውድድሩን ማሸነፉ ይታወሳል።

ባለፈው ዓመት በበርሊን ላይ በተካሄደው ማራቶን ላይ የዓለም ሁለተኛውን ፈጣን ሰዓት በማስመዝገብ ያሸነፈው ቀነኒሳ በቀለ፥ በመስከረም ወር የሚካሄደው የበርሊን ማራቶን 8ኛው የጎዳና ላይ ውድድሩ መሆኑም ተነግሯል።

የበርሊን ቢ.ኤም.ደብሊው ማራቶን በዓለም አቀፉ የአትሌቲክፍ ፌዴሬሽኖች ማህበር የወርቅ ደረጃ የተሰጠው የጎዳና ላይ የሩጫ ውድድር ነው።

ምንጭ፦ www.iaaf.org